艾美艾尊

玩遊戲輸咗，胡宇崴最後改用手指「彈」大東耳仔，不過都係作下狀就算。 

 



汪東城（大東）、胡宇崴尋日（17/8）抵達廣州，為劇集《愛就宅一起》於20/8開始喺華娛首播進行2日1夜嘅宣傳。大東今個月底24/8生日，同佢情同兄弟嘅胡宇崴就夾埋成班fans喺活動上送花同生日蛋糕俾大東，好surprise呀！

2位俊男喺活動上同粉絲大玩遊戲，輸咗嘅大東原本要接受懲罰──俾胡宇崴錫一啖，胡宇崴聽完即刻耍手擰頭大叫：「為甚麼要我親男生？」場面搞笑。玩完遊戲之後，fans就突然推出1個5層嘅生日蛋糕，大東驚喜到只係識得不斷嗌「嘩塞！」。問胡宇崴送咩禮物俾好兄弟，佢就話送愛心，然後即刻攬住大東，果然係難兄難弟。

大東同胡宇崴合作《愛就宅一起》日對夜對，2人喺記者會上不停重覆佢哋真係玩得好開心，成個劇組都好合拍，所以異口同聲表示想有續集。之前盛傳2個男仔爭女主角楊丞琳（Rainie），有記者話大東同Rainie有夫妻相，會唔會有發展可能？大東就笑住咁答：「未來是無可限量的，令人期待的，她跟我表妹其實長得蠻像，所以我們是兄妹戀啦！」冇承認冇否認，咁究竟有冇可能呢？好可惜Rainie身在杭州宣傳自己另一套新戲，如果唔係就可以捉佢2個問清楚喇！




來源: www.newmonday.com.hk