艾美艾尊

吳尊凌晨時份，於官網上載女兒(左)同姐姐女兒嘅合照。


今日吳尊喺台北舉行簽書會，請來辰亦儒任主持。











吳尊日期喺新書《決定勇敢》推出前夕，公告已為人父，女兒就快三歲消息震撼中港台；至翌日舉行記招，更宣佈老婆已懷第二胎，囝囝快將出世，湊成一個「好」字——一係唔爆，一係就爆到咁。但幾驚訝都好，都要講一句:恭喜晒吳尊!

不過，今次吳尊公開認妻女一事，令佢真係受咗好大壓力。台灣傳媒如數家珍列出歷年來吳尊點樣否認有妻有女一事，難怪有人話當日吳尊記招上氣氛有啲僵。但吳尊話，太太林麗瑩比佢更勇敢。

今日有周刊為吳尊做咗個專訪，詳細披露同太太認識至拍拖、結婚經過同心路歷程。今次決定要宣佈自己已屬有家室之人，太太一直默默支持。吳尊歎道:「從前我們每次去街都是一大班人，我不能跟她和女兒一齊行，如果女兒叫爸爸我又不能應，我會很難過，太太看到我的樣子很不自然，知道我心不舒服，你們覺得我勇敢，其實她更勇敢。」轉眼女兒已經就快三歲，多麼想堂堂正正拖著爸爸的大手行街街去遊玩，現在終於可以了。

至於同太太相識經過，原來唔止天賜良緣，仲係家人牽紅線。太太係吳尊姐夫嘅親戚，嗰陣吳尊16歲仔都未拍過拖，於是姐夫就介紹個女仔佢識，就係林麗瑩。吳尊更謂細個好怕醜，就連打個電話俾林麗瑩，都要鼓起莫大勇氣先夠膽。

後來吳尊要去澳洲讀書，嗰陣佢哋拍拖兩個月，吳尊話佢去到澳洲後，好想返去，好掛住家人及女友，日日喊:「我覺得那時是我人生中哭得最多的，眼淚都流光了，我去了不夠三星期就返回汶萊。」第一次去澳洲讀書不成功，第二次就成功喇，因為女友陪佢一齊去。

吳尊仲爆咗個秘密，佢話原來囡囡係made in Hong Kong 0架。「我來香港工作，太太來陪我，就有了她，她是made in Hong Kong。」太太生B嗰陣，吳尊都有陪埋入產房，一隻揸相機，一隻手拍video，好忙，但見到BB健健康康已經很足夠，吳尊仲話囡囡一半似佢，一半似媽媽，咁大個女一定係大美人啦。

自從交代「已婚」身份後，吳尊如常出席活動谷新書，今日仲喺台北舉行簽書會，請來昔日飛輪海好兄弟辰亦儒任簽書會主持。雖然台北受颱風「菲特」影響，但仍無損吳尊心情，與辰亦儒台上打鬧互搞氣氛，狀甚輕鬆。


來源: 蘋果日報