艾美艾尊

炎亞綸（左一）同汪東城（右二）跟性感女舞蹈員大跳貼身舞，唔怪得 fans呷醋到大聲尖叫。


飛輪海噚日喺簽唱會上又唱又跳。


吳尊攞住呢兩年獲得嘅獎座，竟然唔小心整斷咗個獎。


台灣組合飛輪海噚日喺九龍灣舉行簽唱會，有 2,000個 fans到場支持，原定下晝 2點開始嘅活動，足足遲咗個半鐘先開始。四子一出場就用半鹹淡廣東話狂冧 fans，汪東城仲成日扯起件衫騷身材！
吳尊呢個月 10號 31歲生日，大會送上蛋糕同佢預祝，佢話正日想同屋企人去旅行慶祝，但係緋聞女友楊丞琳就冇份喇，又話楊丞琳唔識煮嘢食，所以應該唔會收到佢整嘅蛋糕喎。


飛輪海將呢兩年喺中港台攞嘅音樂獎座攞出嚟騷吓哥利，點知吳尊唔知係咪太用力，竟然將其中一個獎項整斷咗，好鬼瘀皮。
另外，周筆暢噚日喺海港城為新碟《 i魚光鏡》舉行簽名會，烈日當空之下都有近百粉絲排隊，問佢轉咗女性化造型慣唔慣？佢話：「我唔鍾意一個 style到底， fans就有啲話鍾意，有啲接受唔到。」
筆筆又話家見到靚裙都會買，不過講到會唔會露事業線，佢就話：「低胸裙家都未得，可能過一排我會愛上。」筆筆聽晚將會同張芸京做新城音樂會。



來源: 蘋果日報