艾美艾尊

大膽假設林峰已中毒，夠膽對住半百傳媒公開與「千語BB」的關係，含春般對住鏡頭笑，哪怕被狗仔隊貼身窮追，任何時候都表現Hyper，就連替電影《忠烈楊家將》拍海報也High到爆，谷行15吋麒麟臂上陣，又在現場癲嗌震聲勢，嚇窒同場大隻仔吳尊。
　　
黃百鳴出品、于仁泰導演的《忠烈楊家將》將於下月4日上演，有看過電影預告片的，十個九個讚，場面、節奏可媲美荷里活製作，未睇就快上網搜片。

　　時裝撞古裝

　　日前，于導演吹雞為電影拍攝新海報，「導演話想有Gimmick，古裝片海報唔想咁老套，玩次crossover，時裝造型見人，個個滿身傷痕披件甲上陣，idea好新，老闆即時扑槌去馬，仲即晚call齊人，兩日後埋位拍攝。」知情者透露，鄭伊健、林峰均丟低工作現身，吳尊、周渝民（仔仔）、于波、李晨、付辛博等則仆來港埋位。

　　一人披一件甲，演老大的伊健最早到場，平日有操肌的他換上破Tee披件甲便埋位，效果好爆，曾擔任中南海保鏢的于波更不用說，掉下外套，結實胸肌令人眼突，仔仔則好保守地揀件Tee套個手臂甲，貫徹戲中三郎的性格。

　　掌上壓谷肌

　　林峰到場後，即走埋邊黐牆做掌上壓，誓要谷行15吋麒麟臂，「阿峰知道要露兩臂，想效果結實，其實佢本身線條都好好，聽講佢前一晚收到電話後，水都唔敢飲多啖。」工作人員透露，為林峰披好甲後，剛巧導演到場探班，林峰即突然大嗌震聲威，嚇到化緊妝的吳尊眼突，迅即坐直身睇好戲，「唔係講笑，阿峰嗌完，現場氣氛亦火起，好有氣勢，導演都讚佢叻仔。」


來源: 頭條日報