艾美艾尊

集有錢及靚仔於一身的吳尊，除了是女士的夢中情人，更令男性既羨慕又妒忌。


萬人迷吳尊出身自汶萊富裕家庭，是個不愁衣食的闊少爺，但他沒有因此變成二世祖，反而努力工作。莫說是演藝事業，就連家族生意都傾盡全力，隨身帶備手提電腦處理業務。集人氣偶像與生意人於一身的他，忙得沒時間識女仔拍拖，而他表示擇偶條件十分簡單：「最緊要啱feel。」

事業篇
歌影視三棲的型男吳尊，幕前工作已忙到甩轆，連休息時間都不夠，但仍心繫家鄉的健身室生意。為了時刻可以知道公司情況，他每次出埠必定帶備Laptop同行。吳尊說：「依家唔可以事事都親力親為，所以去邊都同我嘅Laptop一齊，方便隨時隨地都可以處理公司業務。我希望下一步可以喺上海開分店，想做到喺汶萊以外嘅地方都有分店，邁向國際化。」可見吳尊事業心極重。

突破範疇 反串上陣
天生靚爆鏡的吳尊，所演幾乎都是俊男角色，要有所突破，自然要演一些另類角色。他笑言不介意反串上陣，問到可會為藝術犧牲作裸露演出？他說：「要睇吓劇本同埋自己演唔演得嚟，唔着衫OK，但唔會光脫脫。（以演藝作終身事業？）睇情況，如果做得開心，就會一直做落去。」他最想和荷里活男星韋史密夫合作，很喜歡對方演出的電影《Bad Boys》，渴望在銀幕上當對方的拍檔；女藝人則沒有特別去想要跟誰合作。對於外界指他與鍾嘉欣樣貌相似，吳尊看完對方短髮Cap帽的中性打扮照後表示：「我未見過佢真人，但睇呢張相確係有啲似。」

愛情篇
吳尊事業發展得有聲有色，但感情事似乎沒甚麼起色。張韶涵、林依晨以及S.H.E成員Ella等統統都只是緋聞女友，至今仍未覓得真命天女。不過他並不心急，深明急也急不來，感情事還是順其自然好了，反正他根本都分身不暇。吳尊認真地說：「真係冇時間，工作實在太忙喇！（會唔會揀圈中人做女朋友？）唔一定，最重要係有感覺，如果有感覺就會產生愛情，但係仲未遇到。（有咩擇偶條件？）冇特定嘅條件，冇太多時間去諗。要開始一段感情嘅話，我會諗好多嘢，好似時間點分配、有冇足夠時間陪對方、佢會唔會因為我要犧牲某啲嘢又或者承受好大壓力等等。依家工作咁忙，自己都唔敢諗太多，都係順其自然。」處處都為未來的另一半着想，從對方感覺出發，相信吳尊必定是位體貼細心的男友。

純情初戀 親自下廚
他又自爆做過最浪漫和最柔情的事：「十五歲時喺汶萊海邊，第一次鼓起勇氣拖住女仔隻手。亦都試過特登去學女朋友鍾意食嘅菜式，然後煮咗成枱佢鍾意食嘅嘢畀佢食。」不用親身感受，單是聽都已經冧死女。

近年娛樂圈興地下情或瞞婚，不過吳尊表現得落落大方，不介意公開戀情。他說：「睇情況，我唔介意公開，只要唔影響對方正常嘅生活。（結婚呢？）都係睇情況，我希望公開，只係唔希望家人因為我嘅身份而太辛苦。（會唔會生小朋友？）當然會。（你會係嚴父定慈父？）我覺得我兩樣都係。」問到家人可有催婚？吳尊稱：「我一年只係返得汶萊一、兩次，都係大時大節先有時間返去，爹哋從來冇催過，佢會放喺心裏面唔講出嚟，佢比較怕醜，我自己都係，所以我會明白佢心意。」

友情篇 懶理謠言 一笑置之
常被傳與飛輪海另一成員汪東城（大東）不和，問到可有其事？他答：「我哋早前出碟喇，碟都就出你話有冇不和？根本冇啲咁嘅事，我哋四個相處得好愉快。（報道有冇影響你哋嘅兄弟情？）嗰啲都係傳媒寫嘅，大家已經睇到冇咩感覺。我哋睇到報道都係笑完就算，唔會在意o架。」

因忙得沒有時間，故吳尊的圈中朋友不多，亦沒有太多時間可以和朋友見面，他說：「啲朋友成日都會好奇我係咪真係咁忙，事實上我真係冇太多私人時間。」

幼承庭訓電筒傍身
經常四圍飛的吳尊原來有個小習慣，每次出埠都會把電筒放在行李內。他說：「細個時跟住爹哋出國，爹哋因為擔心飯店會忽然停電或者發生火警，所以都會帶備電筒傍身，我大個咗之後就有樣學樣喇。」

粉絲追車力勸不果
既然是萬人迷，自然有大批粉絲擁戴和追隨，當中也有些會有奇怪要求以及過激行為的粉絲。吳尊笑說：「曾經有個內地嘅fans，將自己嘅護照交畀我，叫我帶佢走，大家都畀佢嚇親。」

對於fans經常不顧安全追車，吳尊大表無奈，已力勸fans不要這樣做：「好多人都講唔聽，有時追車跟得太快太近，仲差啲發生意外，咁樣唔顧自己同他人嘅安全，真係唔好。（點樣勸導fans？）我有時會喺自己個blog提醒佢哋，或者借傳媒講出嚟，亦都會直接同佢哋講唔希望佢哋做咁樣。」